[Kde-i18n-nds] Veel to veel?

[Soenke Dibbern]

An'n Fr., den 14. Sep.'07, hett Arne dit Klock 07.46 schreven:

> Moin-moin!
>
> Ik har dor een Problem mit mien Översetten: Wenn ik mp3-Dateien mit
> KAudiorecorder ruttrecken will, denn is dat afsolut nödig de Musikoort
> antogeven. ... Avers: De Musikoorden sünd
> altohoop in platt. Dat mag ik ok wohl leden - man, dat duert jümmers
> een kleenen Ewigkeit üm klar t okreegen wat nu wat is!
> [...]
> Ik mutt seggen, dat ik de Översetten ganz geern mag! De het Humor! -
> Is avers nich so praktisch, wenn man just darbi is...
>
>
> Mien Fraag nu an't Enn: Wo steckt de verdüvelt Oorten?? I kunn de
> PO-Datei nich finnen!! (In KAudiorekorder is de wohl nich) - Oder har
> ik da mal op mien Rechner rümspeelt und de Oorten sünd blots bi mi
> so?? ;)

Moin Arne,
schöön, wat vun Di to hören!

En Programm "KAudiorecorder" kann ik nich finnen, ik nehm also maal an, du  
wullst "KAudiocreator" schrieven. De Musikoorden staht binnen  
kdemultimedia/libkcddb.po, dücht mi.

Du hest dor een vun de groten Problemen bi't Översetten anröögt: Wo wiet  
schall dat denn nu gahn mit dat Översetten? Jüst so wiet, as in't  
Hoochdüütsche, so dat de Brukers, de mehr Hooch as Platt snackt, sik  
fuurts torechtfinenn köönt? Man denn mööt wi ok "E-Mail" ansteed vun  
Nettpost/Nettbreef bruken, "Instant Messaging" ansteed vun Kortnarichten,  
"Player" ansteed vun Afspeler, un ik weet nich wat sünst noch allens.

Betherto hebbt wi jümmers so veel as jüst mööglich översett. Wat dor nu  
jümmers gode Begrepen bi rutkamen sünd, dor köönt wi uns vun mi ut jo över  
in de Klafutten kriegen (ik fraag mi so un so, worüm nich veel mehr Lüüd  
maal över dit oder dat meckert) - man dor will ik nich geern vun laten,  
dat wi so veel as bloots mööglich översetten doot.

Wat meent denn ji all, de ji hier mitlesen doot, dor to?

För Dien besünner Problem mag dat mehr as een Lösen geven:
1. Bruuk en anner Programm, dat dissen Fehler nich hett ;-)
2. Warr Di eenfach de plattdüütschen Begrepen an. ;-)
3. Mi dücht, Du kannst ok binnen Konsole 'export KDE_LANG=de;  
kaudiocreator &' utföhren. Denn kriggst dit enkelte Programm op  
hoochdüütsch vörsett. Un ok de "hoochdengelschen" Betekers för de  
Musikoorden.

Hölpt Di dat wat?

Holl Di fuchtig,
Sönke